Kapitel I

… Et was so in’n Anfank van de fiftiger Jaohre. Üöwer­all an de Ruhr un auk hier, mähr güen nao’t Mönsterland to, was flitig nao Kuehlen und Isensteen schürft waorn. Auk dicht bi Holthövels Hoff harrn se sonen Pütt staohn, wo en Vohrmester met sine Mannschopp ant Kuehlen­söken was. De Schult Holthövel keek wahn schalu nao düsse nie Naoberschopp; denn Kampsbuer, de en Frönd van Holt­hövel was, un sinen Hoff in de Ruhrgiegend liggen harr, wo se all lange Tid den Biärgbau bedrewen, harr em faken klagt, dat’t an de ganße Ruhr baolle kinen regelären Buern mähr gäff, wil de Zechen dao alls rungeneeren deihen; de Lännerien göngen dao te Grunn, üöwerall könn’m graute Löcker seihen – Dagesbrüche deihn de heeten, de Hüser föllen ineen; ja, dat Aller­düllste wäör dat, dat de Zechen sogar den Buern dat Land afniehmen können – expropreeren deih dat heeten.
So harr de Schult wull Rächt, wenn he schalu nao den nien Naober keek – „Nie Härens,“ sagg he dann, „hanget nie Hecks!“ – Sundags Muorgens, vüör de Hohmisse, stonnen de Buern up’n Kiärkhoff in de Stadt gewüehnlik noch en Pösken tesamen un smökden ut üöre Pipen de Nüesels ut, dat dat män so knistern un knastern deih. Dann gonk auk de Dokter Assum so dran längs, üm met sine Kunnen en Präölken te haollen.
„Ist mich doch ein kurioser Mensch, dieser Ruhrmann,“ sagg he to Schult Holthövel, „nimmt mich keinen Schnaps an den Mund!“
„Ruhrmann is en wackern Mann, de weet, wat he will; und dat he kinen Snaps mähr drinkt, hätt sinen gueden Grund,“ antwaordte de Schult.
„Weil der Kerl früher zu viel gepichelt hat.“
„Nu jä,“ sagg Holthövel, „he was fröher Snapsstöker un brach dann sine Waore söwst met sin Fohrwiärk beß wid in’t Siegen’ske un wu dat denn so geiht, son Fohrmann mott te faken de Hacke unnersetten.“
„Und da kriegte er denn das Delirium tremens.“
„Nu ja, he was kollersch un woll in sine Wahnigkeit bisterwägs in’t Water laupen; ick snappde em nu noch grade to rächte Tid un sitdem hätt Ruhrmann kinen Snaps mähr brannt un auk kinen mähr drunken.“
„Das ist viel, sehr viel,“ sagg de Dokter un beföhlde sine dicke, raude Niäse, „das war mich charakterfest.“
„Wat ik fraogen woll,“ sagg de Schult nao ne Wile, „wu geiht’t met de Küehlerie? sall würklich de Zeche baolle in Gang kuemmen?“
„Und ob! Das ist ja aber auch sehr gut, das gibt Geld ins Land und ein besseres Leben.“
„Dao mag ik nix van häören,“ antwaordte de Schult, „denn wat mi Kampsbuer ut dat Märkiske dervan vertellt, ludd grade nich t’ beßt“
„I was!“ sagg de Dokter, „frag er seinen Freund Ruhrmann, der kennt was von der Welt, wenn er auch sonst ein kurioser Patröner ist. Was er mir von der Bergwerkskarriere gesagt hat, lautet anders und mein Sohn Filius, sagt er, wäre ein tüchtiger Junge und weil er auch schön zeichnen könne, müsse er auf die Bergschule nach Bochum – und das soll er auch.“
„Dat wäör schade vüör den Jungen“, antwaordte de Schult.
„Das versteht Er nicht! Adieu!“ –
Wu sick Rudolf freide, dat he nu up ne Schole soll, wo he met Latin und so wat derhiär nix mähr te dohn harr. De olle Ruhrmann harr em ne ganße Dracht Böker kofft, wo wat van’t Biärgwiärkswesen in stonn. Wat was dat so grüggelsk un doch so nett te liäsen, wu dat so Hunnerte van Fot deip in de Arde togonk, wat dao vüör Heinzel­männkes üör Wesen drewen, wo de Biärgmann met sla­gende Wiäder un allerhand Gefaohren verkiähren moß. Wu stolt was he up sik söwst, dat he sik son Handwiärk üöwerniehmen wull! Un doch, je neiger de Tid heran­rückde, dat he weg moß, je bedrängter wudde et em üm’t Hiärt; ja, wann he män sin Annaken metniehmen könn! So gonk he eenes Dags wier nao Holthövels. Annaken stonn bi’t Dannenbaimken, wo se sik en Blomenbeet anleggt harr; se was dao iwrig ant Begeiten.
„Uss’ Dannenbaimken versort nich“, sagg se, „un wenn Du nu wierkümmst doht wi hier Moder un Vader spielen.“
Rudolf wudde ganß raud, sagg nix, namm sin Taskenmeß un sneet R. A.; A. H. in den Bast, ganß unnen, wo noch kine Twöge satten.
„Dat is nett, dat is nett“, sagg Anna, „nu kik ik jedden Dag to, of de Bokstawen auk grötter wärd.“